சுயம்பு சரணம்

இருதய நடுவுள் அகண்ட விழிப்பாம்
ஒரேகுரு சுயம்பு சரணம்

இருதய நடுவுள் அம்மை யப்பராம்
ஒரேகுரு சுயம்பு சரணம்

இருதய நடுவுள் ஆதி நிச்சயம்
ஒரேகுரு சுயம்பு சரணம்

இருதய நடுவுள் ஞானம் ஓதி
ஒரேகுரு சுயம்பு சரணம்

இருதய நடுவுள் கோடா நீதி
ஒரேகுரு சுயம்பு சரணம்

இருதய வாயுள் இனிக்கும் போதி
ஒரேகுரு சுயம்பு சரணம்

இருதய வாயுள் பனிக்குஞ் ஜோதி
ஒரேகுரு சுயம்பு சரணம்

எங்கு தேடினும் இல்லார் என்னகத்
துள்ளார் கைப்பிடித் திழுத்தடி யேனைத்
தன்னுள் ஈர்க்கத் துடிப்பார் நல்லார்
வல்லார் சுயம்பு சற்குரு சரணம்

எனதுட் சத்து எனதுட் சித்து
எனதுள் ளின்பு எனதுட் சத்தி
எனதுட் சித்தி எனதுண் ணிறைவு
சுயம்பு சற்குரு சரணம்

உண்ணிறைவு = உள் நிறைவு

எனதுள் ளன்பே எனதுள் ளறிவே
எனதுள் ளின்பே சுயம்பு குருவே
நின்னுள் என்னை ஈர்த்தே இன்னே
நின்போல் மாற்று சரணடைந் தேனே

ஈனன் என்னை நின்பால் சேர்த்தேன்
தான மாக நின்னைத் தருவாய்
நீயே யன்றி சார்பு வேறிலேன்
தாயே சுயம்பு குருவே சரணம்

நாயேன் என்னை நின்பால் சேர்த்தேன்
நாய னாகித் தழுவிக் காப்பாய்
நீயே யன்றிப் புகலிடம் வேறிலேன்
எந்தாய் சுயம்பு குருவே சரணம்

நாயன் = நாயகன்

ஈயேன் என்னை நின்பால் சேர்த்தேன்
பேரீ கைகொண் டாய்எனைக் காப்பாய்
நீயே யன்றித் தஞ்சம் வேறிலேன்
தேவே சுயம்பு குருவே சரணம்